TFK / The Flying Koteletts

Sport Giger/Weder

wemä sini Muskle gschpürt
ohni das me sie berührt
hettmers wieder emol übertriebe
blibsch am beschtä nu no liege
jo mit em Sport – dere gsundä Sach
hani scho sit Johre Chrach
sit Johre sind mer zwei – wiä Chatz und Muus

hüt bini uf d’Finnebahn
und ziemlich schnell – nai gar nöd lahm
han i so mini Runde dreiht
doch leider het mer niemert gseit
wie da isch – da mit em dehne
drum tömmer hüt au mini Sehne
ziemlich furchtbar – und grusig weh

jo i chami fascht nüme bewege
isch alles wani no cha säge
und da isch wieder emol wäge
dem liebe Sport

schpöter no is Hallebad
d’Flosse lieged scho parat
mit em Schnorchel hie und her
isch jo wörklich nöd so schwer
doch wäg de Brillä – wo beschlot
gseh i nöd wo‘s duregot
ä Riesebühle – da isch dä Dank däför

i chum vom Rollerblade hei
und hinke bös mit em linke Bei
am Schiibei hani i ä grossi Wunde
i ha ä bissigi Bremsi gfunde
sonän Hund het wöllä uf s’Trottoir liggä
und het mer gad dä Weg abgschnitte
i glob es got em – hüt glich we mer

drum lonis jetzt viel lieber sii
da mit em Sport – da isch verbi
i mach viel öppis bessers jetzt
s’einzig – was no ume wetzt
isch dä Dumä uf dä Fernbedienig
lueg Eurosport – und gar nöd wenig
jetzt tönd mer nuno – mini Auge weh